Hargeysa (HT)- Wasiirka Wasaaradda Maaliyadda iyo Horumarinta Dhaqaalaha JSL Md. Cabdilaahi Xasan Aaden oo uu weheliyo Agaasimaha Guud ee Wasaaradda Md. Maxamed Xasan Saleebaan, ayaa kulan arrimo door ah lagaga hadlay la yeeshay Madaxa xafiiska diblomaasiyeed ee Dawladda Ingiriiska ku leedahay Hargeysa Danjire Ilyas Malek iyo Ku-xigeenkiisa ahna Madaxa Xafiiska Mashaariicda Ms. Tatiana Feranandes.
Sidaasna waxa lagu sheegay war-saxaafadeed ka soo baxay xafiiska xidhiidhka bulshada iyo Warbaahinta ee Wasaaradda Maaliyadda iyo Horumarinta Dhaqaalaha.
Warka laga soo saaray kulanka masuuliyiinta labada dowladood ku dhexmaray Hargeysa, waxa lagu yidhi, “Wasiirka ayaa la wadaagay madaxda Xafiiska Dawladda Ingirriska sida ay u fuleen Mashaariicda Dawladda Ingiriisku qaybta ka tahay ee Sanduuqa Horumarinta Somaliland ee SDF2, kuwaas oo hada dhamaad ah iyaga oo sheegay in mashaariicdaasi ahaayeen qaar wax-ku-ool ah, is la markaana wax weyn ku soo kordhiyey guud ahaan Dalka, gaar ahaan deegaamadii laga fuliyey.
Waxa ka mid ahaa mashaariicda uu maalgalinayey Sanaduuqu wajigaa hore; Horumarinta Biyaha, Wax-soo-saarka Beeraha iyo Xoolaha, Dhismaha Dakadda Maydh, Jidadka iyo kuwo kale.”
War-saxaafadeedka ka soo baxay wasaaradda Maaliyadda, waxa lagu sheegay in gebo-gebadii kulanka laysla qaatay qodobbo dhowr ah oo bud-dhig u ah bilowga wejiga 3aad ee Sanduuqa horumarinta Somaliland oo dowladda Ingiriisku dhaqaale badan kaga qayb-qaadato.
“Kulanka oo socday saacaddo badan, waxa ka mid ahaa go’aamadii la is kula qaatay in Sanduuqa Horumarinta Somaliland (SDF) wajigiisa saddexaad ee bilaabmi doona dhawaan la soo dadejiyo si loo daboolo baahida ku-talo-galka kharash ee mashaariicda qorshaysan loo qoondeeyey, iyada oo gunaanadkiina labada dhinac hoosta ka xariiqeen muhiimada ay leedahay joogtaynta xidhiidhka iyo xoojinta wada shaqayn ay yeeshaan Wasaaradda Maaliyadda iyo Xafiiska Dawladda Ingiriiska ee Hargeisa,” sidaas ayaa lagu sheegay war-saxaafadeedka.